Derhalwe Is Ek Hier

29 Januarie 2011 / Shevart 24 5771

Oordele / Mishpatim

Eksodus / Shemot 21:1-24:18

Jeremia / Yirmeyahu 34:8-22;33:25-26

Matthéüs / Mattityahu 5:38-42

Eksodus / Shemot {21:15} “En hy wat sy vader of moeder slaan, moet sekerlik gedood word. {21:16} En hy wat ‘n mens steel en hom verkoop—of as hy in sy besit gevind word—dié moet sekerlik gedood word. {21:17} “En hy wat sy vader of moeder vloek, moet sekerlik gedood word.”

Terwyl ek die bovermelde verse van hierdie week se Parasha gelees het, het ek gewonder waarom ‘n fisiese aanval op jou vader en moeder, die ontvoering van iemand en om jou vader en moeder te vloek, as halsmisdade beskou en met die dood strafbaar was. Laat ons eerstens die vraag behandel waarom die dade in verse 15 – 17 gemeld, as halsmisdade beskou is en die doodstraf sou regverdig.

My vrou en ek het onlangs die boek Ester, as deel van ons daaglikse leesplan gelees en ek glo dat ons inderdaad in hierdie boek die antwoord op dié vraag kan te wete kom:

Ester / Esther {1:16} “Toe sê Memúgan voor die koning en die vorste: Nie alleen teen die koning het koningin Vasti misdaan nie, maar ook teen al die vorste en al die volke wat in al die provinsies van koning Ahasvéros is. {1:17} Want die geval van die koningin sal by al die vroue bekend word, sodat dit hulle manne in hul oë veragtelik sal maak as daar gesê word: Koning Ahasvéros het bevel gegee om koningin Vasti voor hom te bring, maar sy het nie gekom nie.”

Hieruit blyk dit dat koningin Vasti se optrede nie net die koning veronreg en in ‘n verleentheid gestel het nie, maar haar weiering om voor die koning te verskyn, ook die integriteit van die ganse samelewing van háár dag in die gedrang gebring het. Ofskoon sy nie haar vader of moeder gevloek het nie, is ek nietemin oortuig dat die effek van haar optrede, juis dié dinge sou veroorsaak het, waaroor die eerste gedeelte van die Skrifgedeelte handel.

Die Tora skryf die beginsels van ‘n regverdige samelewing voor – ‘n samelewing op die beginsels van die huwelik (man en vrou) en gesinseenheid gegrondves. Enigiets wat dus hierdie beginsels sou skaad, verdien die ergste straf omdat die versteuring van familiebeginsels tot nadeel van die samelewing, wat vervolgens tot die ineenstorting van wet en orde en uiteindelik tot ‘n godlose samelewing sal lei! Juis om hierdie rede is egbreuk ook met die dood strafbaar.

Terwyl ek hieroor nagedink het, het ‘n ander Skrifgedeelte met betrekking tot vaders en moeders my bygeval en dit word aangetref in ‘n Skrifgedeelte uit die Hernieude Verbond (Brit Chadasha):

Matthéüs / Mattityahu {10:37} “Wie vader of moeder bo My liefhet, is My nie waardig nie; en wie seun of dogter bo My liefhet, is My nie waardig nie.”

Dit het die vraag laat ontstaan: Het Jesus die Tora weerspreek, meer in die besonder hierdie Parasha, toe Hy hierdie woorde gespreek het? Die antwoord is vanselfsprekend “nee”! Jesus was besig om vir diegene wat hom wou volg, te verduidelik dat hulle nie verdeelde lojaliteite kon hê nie. Indien ons ons lewens aan Jesus as ons Here en Redder toevertrou, koop Hy, deur Sy dood aan die kruis, ons as’t ware uit die mag van die duiwel. Ons is dus vrygestel van die straf van die Tora, wat die dood uitspreek oor almal wat sondig, sowel fisies as geestelik – ongeag die oortreding! Voordat ons gered is, het die duiwel ons besit. Ons het deur die sonde onsself aan hom verkoop, maar deur ons redding, behoort ons aan Jesus. Jesus het ons van die duiwel teruggekoop deur in ons plek te sterwe en dus behoort ons nie aan onsself nie.

1 Korinthiërs / Korintim Aleph {6:20} “Want julle is duur gekoop. Verheerlik God dan in julle liggaam en in julle gees wat aan God behoort.”

Dit is dus verstaanbaar dat verdeelde lojaliteite vir ‘n dienaar van God totaal onvanpas sou wees.

Ek onthou nog toe ek tot die bediening beroep is, dat ek moes besluit om my bejaarde ouers te verlaat aldan nie en die beroep as geestelike leier van die Gemeente Melech Yisrael in Kanada te aanvaar. Dit was ‘n besonder moeilike tyd vir my vrou en myself, maar dit was die woorde in Matthéüs 10:37 wat my gelei het om wel my vader en moeder te verlaat en die Here te volg. Derhalwe is ek vandag hier!

Congregation Melech Yisrael alle regte voorbehou

Daar Is ‘n Stryd En Ons Is Die Beloning

22 Januarie 2011 / Shevat 17 5771

Jetro / Yitro

Eksodus / Shemot 18:1 – 20:23

Jesaja / Yeshayahu 6:1 – 7:6, 9:5 – 6

Matthéüs / Mattityahu 5:17 – 32

Hebreërs / Ivrim 12:18 – 24

Eksodus / Shemot {20:16} “Jy mag geen valse getuienis teen jou naaste spreek nie. ”

Daar is Één wat nog nooit ‘n leuen vertel het nie, maar daar is ook één wat aanhoudend lieg. Die leuenaar en die Een wat nog nooit ‘n leuen vertel het nie, is in stryd met mekaar en ons is die slagveld. Hierdie stryd sentreer om wie die beherende belang in ons lewens sal hê.

Vertel ons werklik die waarheid, die volle waarheid en niks behalwe die die waarheid nie? Vertel ons altyd eerlik die waarheid oor ons ouderdom, ons gewig, die produkte wat ons verkoop, die belasting wat ons veronderstel is om te betaal of selfs oor God? Hierdie is hoegenaamd geen geringe of onbeduidende vrae nie! Die rede is omdat dit ewige gevolge het – by God is dit ‘n saak van integriteit.

Jesus die Messias is die Een wat altyd die waarheid spreek, terwyl die satan die een is wat aanhoudend lieg. Albei is op hierdie oomblik in ons lewens aan die werk. Hoe weet ek dit? Ek wéét omdat elkeen van ons op een of ander tyd, op een of ander wyse gelieg het.

Johannes / Yochanan {8:44} “Julle het die duiwel as vader, en die begeertes van julle vader wil julle doen. Hy was ‘n mensemoordenaar van die begin af en staan nie in die waarheid nie, omdat daar in hom geen waarheid is nie. Wanneer hy leuentaal praat, praat hy uit sy eie, omdat hy ‘n leuenaar is en die vader daarvan. ”

Hiervolgens word die stryd vandag oor ons gevoer, enersyds deur die satan, wat vol leuenagtigheid is en andersyds deur Jesus, wat vol van die waarheid is. Ons verkeer in die middelpunt, die voorwerp van die stryd – ons is die slagveld. Ons bevind ons inderdaad waar die stryd óf verlore óf gewonne is. Die eer van God, die boodskap van die Koninkryk en ons ewigheid is op die spel. Dit sentreer naamlik om één feit, één uitdruklike gebod van God, om “die Here jou God lief te hê met jou hele hart en met jou hele siel en met jou hele verstand”. As jy dít doen, sal jy vanselfsprekend “nie valse getuienis lewer nie...” – jy sal die waarheid, die volle waarheid en niks behalwe die waarheid spreek nie, so help jou God!

Wat is valse getuienis? ‘n Persoon wat valse getuienis lewer, is iemand wat óf tydens ‘n gesprek, getuienis of ‘n geskrewe of gesproke word, iets van ‘n ander person onthul wat minder as die waarheid is of verskil van die waarheid – ongeag hoe subtiel dit ookal mag wees! Ons kan valse getuienis lewer in ‘n hof, in ‘n persoonlike dispuut, in ons verhoudings, in ons alledaagse gesprekke en lewe. Ons maak ons daarvan skuldig deur soveel as één woord of skinderstorie te herhaal of selfs as ons sarkasties is, by voorbeeld deur te huigel, wenkbroue te lig of deur ‘n veelseggende oogknip. Ons lewer dus valse getuienis indien ons oor iemand of iets lieg en God verafsku leuenaars.

Spreuke / Mishlei {6:16} “Hierdie ses dinge haat die HERE, en sewe is vir sy siel ‘n gruwel:

{6:17} trotse oë, ‘n leuenagtige tong en hande wat onskuldige bloed vergiet,”

Jesus is egter die verpersoonliking van alle waarheid.

Johannes {8:32} “En julle sal die waarheid ken, en die waarheid sal julle vrymaak. ”

Die mate waarin ons die waarheid praat, die waarheid eerbiedig en die waarheid in ons lewens uitleef, is die mate waarin ons die vryheid deur die Messias sal ervaar om ‘n Geesvervulde lewe te lei. As ons leuens vertel, plaas ons onsself in gebondenheid onder die leuens wat ons spreek. Indien ons ‘n leuen glo, verloor ons ons houvas op die realiteit en eindig gevolglik in gebondenhied onder die leuens wat ons glo. Die waarheid, inteendeel, maak ons vry! Elke keer wat ons die waarheid praat, verhoog en vereer ons God en dít maak ons vry. Telkens wanneer ons in versoeking kom om leuens te vertel, maar daarenteen die waarheid praat, verneder ons die satan en dít maak ons vry. Elke keer wat ons die waarheid praat, word ons vrygemaak van die sonde en skuld van leuens. Wanneer ons die waarheid praat, word die sneeubal-beginsel uitgeskakel, met ander woorde om deur ‘n leuen te probeer om dié leuen wat ons so pas vertel het, toe te smeer, en dit maak ons vry. Telkens wanneer ons die waarheid praat, bewys dit die absoluutheid van die karakter van God en dit maak ons vry. Elke keer wat ons die waarheid praat, lewer ons getuienis aan ‘n leuenagtige wêreld dat ons aan God behoort en dit maak ons vry.

Om die waarheid te vertel, is ‘n kwessie van integriteit. Daar is ‘n stryd aan die gang en daardie magstryd is oor wie jou lewe en myne sal beheer. Dus, volgende keer wat iemand skakel en jy nie geneë voel om met hom / haar te praat nie, moenie iemand laat së dat jy nie tuis is nie terwyl jy wel daar is. Wanneer jy werk toe gaan en die werkgewer verneem of jy die projek, aan jou toegewys, voltooi het, moenie allerlei lukrake verskonings probeer aanbied nie – sê reguit “nee” en dit sal jou vrymaak. As daar verneem word of jy ‘n sekere rekening wat steeds op jou lessenaar lê, reeds vereffen het, moenie “ja” antwoord en dan uitstorm om dit dadelik te gaan doen nie. Ontken dit liewers en verduidelik dat jy dit vergeet het – dít sal jou vrymaak!

Jesus is die volmaakte waarheid. Enige afwyking van die volmaakte waarheid, is dus om op te hou om in Hom te bly. As jy in Hom bly, sal Hy in jou bly en sal jy intieme eerstehandse kennis van die waarheid ervaar en daardie waarheid sal jou vrymaak.

Daar word ‘n stryd in die hemel gevoer tussen die die vader van leuens en die God van waarheid en ons – jy en ek – is die slagveld. Die goeie nuus is egter dat die stryd alreeds gewonne is deur Jesus die Messias. Ons is die oorwinnaars, slegs deur by die waarheid te hou.

Congregation Melech Yisrael alle regte voorbehou

Lewe Met Die Swaard en Sterf Met Die Swaard

15 Januarie 2011 / Shevat 10 5771

Wanneer Om Te Laat Gaan / BeShalach

Eksodus / Shemot 13:17 – 17:16

Rigters / Shoftim 4:4 – 5:31

Johannes / Yochanan 6:22 – 40

Eksodus / Shemot {3:17} “Toe Farao die volk laat trek het, het God hulle nie op die pad na die land van die Filistyne gelei nie, alhoewel dit nader was; want God het gesê: Die volk kan dalk berou kry as hulle oorlog sien, en teruggaan na Egipte. {13:18} Daarom het God die volk laat wegdraai in die rigting na die woestyn, na die Skelfsee toe. En die kinders van Israel het goed gewapend uit Egipteland opgetrek.”

Dit was vir my interessant toe ek in hierdie verse lees dat die kinders van Isarel inderdaad gewapen was met hulle uittog uit Egipte. God sou hulle egter nie naby die Filistyne langs lei nie, ingeval hulle uit vrees vir oorlog, na Egipte sou wou terugkeer. Ek het altyd gemeen dat as jy jouself bewapen, moet jy daarop voorbereid wees om dit te gebruik. In hierdie geval was die kinders van Israel egter bewapen maar nie bereid om te veg nie!

Daar was al heelwat meningsverskil en bespreking oor die feit of gelowiges in Jesus die Messias oor vuurwapens behoort te beskik aldan nie. Vóór my bekering tot die Here, terwyl ek in Florida (‘n staat waar meeste burgers vuurwapens besit) woonagtig was, het ek ook ‘n vuurwapen besit; trouens ek het meer as een besit. Ek het ‘n vuurwapen by my gedra en een in my motor aangehou. Nadat ek gered is, het ek egter van al my vuurwapens ontslae geraak en my veiligheid en sekuriteit aan die Here toevertrou. Met vrymoedigheid kan ek verklaar dat vanaf daardie dag, die Here selfs in hierdie opsig getrou was. Beteken dit dus dat gelowiges in Jesus die Messias nie ‘n vuurwapen vir selfverdediging moet besit nie? Ek moet erken dat ek nie heeltemal seker is daaroor nie. Daar is soms sulke “gemengde” boodskappe in die Bybel.

Ons is almal bewus daarvan dat God moord hoegenaamd nie goedkeur nie, maar dit is verantwoordelik om te sê dat as jy ‘n vuurwapen besit, jy beslis daarop voorbereid moet wees om dit te gebruik. Dit bring ‘n mens voor ‘n problem te staan: indien jy per ongeluk iemand doodskiet, kan die owerhede dit as moord klassifiseer – ten spyte daarvan dat moord hoegenaamd nie jou bedoeling was nie. God keur egter oorlog goed, wat vanselfsprekend sowel wapens as dood behels. Dan is daar in die Bybel nou weer verse soos hierdie:

Lukas / Uri {22:35} “En Hy sê vir hulle: Toe Ek julle uitgestuur het sonder beurs en reissak en skoene, het julle iets kortgekom? En hulle antwoord: Niks nie. 22:36 Toe sê Hy vir hulle: Maar nou, wie ‘n beurs het, laat hom dit neem en so ook die reissak; en wie dit nie het nie, moet sy kleed verkoop en ‘n swaard koop.”

Klaarblyklik het Jesus die dra van ‘n wapen in vredestyd goedgekeur, met die bedoeling dat dit nie gebruik sou word vir ‘n regering-gesanksioneerde oorlog nie. Soos ons weet, het Petrus (Kefa) op die Olyfberg ‘n wapen gebruik, wat impliseer dat hy die wapen moes besit het. In daardie Skrifverband lees ons:

Mattheüs / Mattitayu {26:52} “Toe sê Jesus vir hom: Sit jou swaard in sy plek terug; want almal wat die swaard neem, sal deur die swaard vergaan.”

Hierdie Skrifgedeelte word dikwels aangehaal deur sommige persone wat teen die dra van (vuur)wapens gekant is, maar spreek Jesus Hom werklik daarteen? Ek dink nie so nie. Waarskynlik het Jesus verwys na diegene wat reeds onderweg was om Hom gedwonge met wapens van hul eie gevange te neem. Jesus het hier slegs geprofeteer oor die wyse waarop hierdie persone self sou omkom, welke profesie inderdaad deur die Romeine ten uitvoer gebring is. Hulle het met wapens gekom om die oorhand oor Hom te kry maar hulle sou self deur wapens omkom. Dan is daar egter Skrifgedeeltes soos hierdie een:

Psalms / Tehillim {37:39} “Tau. Maar die hulp van die regverdiges is van die HERE, hulle toevlug in tyd van benoudheid. {37:40} En die HERE help hulle en red hulle; Hy red hulle van die goddelose mense en verlos hulle, want hulle skuil by Hom.”

Sekerlik sou hierdie Skrifgedeelte en soveel meer soortgelyke verse te kenne gee dat dit nie vir ons nodig is om onsself met wapens te verdedig nie. Ons is egter bewus daarvan dat Dawid, voor en nadat hy koning van Israel geword het, meeste van die Psalms geskryf het wat betrekking op God as ons beskerming, het, maar dat hy nietemin altyd swaar gewapen was.

Wat is dus my gevolgtrekking en antwoord op die vraag of gelowiges in Jesus die Messias gewapen moet wees aldan nie? Dit skyn asof daar geen klinkklare Skriftelike bewys is wat die dra van wapens verbied nie, maar laat ons onthou dat indien jy ‘n wapen dra, moet jy gereed en bereid wees om dit te gebruik indien nodig. Andersins mag dit met jou soos met Petrus, ‘n visserman, die geval wees, wat Jesus met ‘n swaard probeer verdedig het toe hy na alle waarskynlikheid die hoëpriester se slaaf probeer onthoof het, maar slegs daarin geslaag het om sy oor af te kap. Sou Jesus nie dáár gewees het om tot sy redding te kom nie, het Petrus gevaargeloop om self onthoof te word.

Congregation Melech Yisrael alle regte voorbehou

Slegs Die Messias Kan Dit Uitdryf

8 Januarie 2011 / Shevat 3 5771

Gaan / Bo

Eksodus / Shemot 10:1 – 13:16

Jeremia / Yirmeyahu 46:13 – 28

1 Korinthiërs / Korintim Aleph 11:20 – 34

1 Johannes / Yochanan Aleph {2:18} “Kinders, dit is die laaste uur; en soos julle gehoor het dat die Antichris kom, bestaan daar ook nou baie antichriste, waaruit ons weet dat dit die laaste uur is.”

1 Johannes / Yochanan Aleph {4:3} “en elke gees wat nie bely dat Jesus Christus in die vlees gekom het nie, is nie uit God nie; en dit is die gees van die Antichris waarvan julle gehoor het dat hy kom, en hy is nou al in die wêreld.”

Uit die bovermelde Skrifgedeeltes, sal julle sekerlik saamstem dat Johannes ‘n ernstige waarskuwing aan ons rig aangaande die gees van die anti–Messias; trouens, ons word gewaarsku dat hierdie gees alreeds in die wêreld bedrywig is. Hierdie gees, waarna Johannes verwys, is nie ‘n persoon nie; dit kan dus ook nie betrekking hê op die bees, in die boek Openbaring (Hitgalut), nie. Dit is ‘n werklike gees, ‘n anti-Messias gees, wat Jesus as God verloën en ook die Vader verloën. Hierdie gees is inderdaad sedert die val van Lucifer uit die hemel, in die wêreld bedrywig. Uit die bovermelde Skrifaanhaling is dit duidelik dat dié gees aktief was in die tyd van Johannes, toe hy sy sendbrief geskryf het en ons sal sien dat dit al bedrywig was in Egipte toe Moses die Farao probeer oorreed het om die kinders van Israel te laat trek. Dié gees is tot vandag toe nog bedrywig. Dit is ‘n bedrieglike, leuenagtige en beherende gees. Ons sien sy bedrywigheid in parasha Bo.

Eksodus / Shemot {10:7} “Toe vra Farao se dienaars vir hom: Hoe lank sal die man vir ons ‘n strik wees? Laat die manne trek, dat hulle die HERE hulle God kan dien. Weet u nog nie dat Egipte te gronde gaan nie? {10:8} Daarop bring hulle Moses en Aäron na Farao terug, en hy sê vir hulle: Gaan heen, dien die HERE julle God. Wie is dit eintlik wat wil gaan? {10:9} En Moses antwoord: Ons wil gaan met ons jong mense en ons ou mense, met ons seuns en ons dogters; met ons kleinvee en ons beeste wil ons gaan, want ons wil ‘n fees vir die HERE hou. {10:10} Toe sê hy vir hulle: Mag die HERE só met julle wees as wat ek julle en julle kinders sal laat trek! Pas op, want julle het ‘n verkeerde ding voor oë. { 10:11} Nie so nie! Gaan dan, julle manne, en dien die HERE, want dít het julle verlang. En hulle het hulle van Farao af weggedrywe. ”

{10:24} “Toe het Farao Moses laat roep en gesê: Gaan heen, dien die HERE; net julle kleinvee en julle beeste moet agtergehou word. Selfs julle kinders kan met julle saamgaan.”

Uit hierdie Skrifgedeeltes, kan ons werklik die beherende aard van die anti-Messias-gees sien en in welke mate dit oor Moses en die kinders van Israel beheer probeer uitoefen het. “Julle kan gaan, maar nie julle kinders nie.”. “Julle en julle kinders kan gaan, maar nie julle vee nie.”. Dit was dieselfde gees wat in Sowjet-Rusland geheers het en wat nou in ander kommunistiese – en onderdrukkende diktator-beheerde lande heers.

In Kuba mag gesinne nie as ‘n eenheid buite die landsgrense reis nie. Die kinders moet agterbly en soms sowel die kinders as een van die ouers. Toe die aanvanklike aantal Jode die voormalige Sowjet-Unie verlaat het, is hulle slegs toegelaat om na Israel te gaan, op voorwaarde dat alles wat hulle besit het, agtergelaat moes word. Hulle is toegelaat om slegs dit wat in één tas pas, saam te neem en die kontantbedrag is beperk en aangeteken.

Sien julle die ooreenkomste tussen die voorwaardes waaronder die Farao, die kinders van Israel gestel het vir hul vertrek uit Egipte en die vereistes wat hedendaagse tiranne hul mense oplê? Dieselfde anti-Messias-gees, wat aktief die Farao beheer het, is steeds aktief en bedrywig.

Feit is dat hierdie bedrieglike-, leuenagtige-, beherende gees nie tot regerings, diktators en tiranne beperk is nie. Dieselfde gees is moontlik aktief in jóú aan die werk. Indien jy ‘n chroniese leuenaar en bedrieër is, as jy voorgee om meer te wees as wat jy waarlik is, as jy ‘n beherende tipe persoon is of ‘n konstante klakous, dan is hierdie anti-Messias–gees in beheer van jou en slegs gebed en Jesus die Messias kan jou verlos!

Congregation Melech Yisrael alle regte voorbehou

God Maak Nie Foute Nie / Die Keuse Berus By Ons

1 Januarie 2011 / Tevet 25 5771

God Maak Nie Foute Nie / Die Keuse Berus By Ons

En Ek Het Verskyn / VaEra

Eksodus / Shemot 6:2 – 9:35

Esegiël / Yechezkel 28:25 – 29:21

Romeine / Romim 9:14 – 25

Eksodus / Shemot {9:17} “Versit jy jou nog teen my volk, dat jy hulle nie wil laat trek nie? {9:18} Kyk, Ek sal môre omtrent sulke tyd ‘n baie swaar hael laat reën soos wat in Egipte nie gewees het van die dag af dat dit gegrond is tot nou toe nie. {9:19} Stuur dan nou en laat jou vee en alles wat jy in die veld het, in veiligheid bring; al die mense en die diere wat in die veld gevind word, en wat nie binnekant gebring is nie—op hulle sal die hael val, sodat hulle sterwe. {9:20} Hy wat die HERE se woord gevrees het onder die dienaars van Farao, het sy slawe en sy vee in die huise laat vlug; {9:21} maar hy wat op die HERE se woord geen ag gegee het nie, het sy slawe en sy vee in die veld laat bly.”

God het die Farao en Egiptenare vroegtydig gewaarsku vóór elk van die plae wat Hy oor hulle land gebring het. Hierdie is egter die enigste plaag waar Hy die mense vooraf waarsku en hulle bevel om hul vee in veiligheid te bring. Dit is ook die enigste plaag waar Hy die mense waarsku om nie na buite te gaan indien hulle nie wil sterf nie. Volgens ons rabbynse wysgere, was die haelstene geweldig groot; trouens, om die lewe van ‘n vier – tot seshonderd-pond koei te bedreig, moes dit inderdaad groot gewees het. Volgens die Skrif, het waarskynlik nie almal in Egipte op God se waarskuwing ag geslaan nie, behalwe ‘n geringe aantal van diegene wat reeds die voorafgaande plae belewe het en nou die God van Israel gevrees het. Dit was die enigstes wat dié waarskuwing gehoorsaam het. Wat was dus die gevolg van ongehoorsaamheid en om nie God se waarskuwing ernstig op te neem nie? Hulle asook hulle vee het omgekom en dit was nie God wat vir hul dood aanspreeklik was nie – dit was hulle eie keuse.

In die hedendaagse Israel is dieselfde maatreël toegepas om die inwoners van Gaza te waarsku om sekere tye, tydens die laaste Gaza-oorlog, binnenshuis te bly. Hul verontagsaming van die waarskuwings, sou, soos aan hulle gesê is, hulle in gevaar stel en moontlik tot hul dood lei. Pamflette is versprei waardeur inwoners in bepaalde areas en woonbuurte gewaarsku is dat die Israeli-Verdedigingsmag van voornemens was om dáár militêre operasies uit te voer. Die verdedigingsmag was dus nie aanspreeklik vir die dood van daardie burgerlikes wat nie op die waarskuwing ag geslaan het nie – die keuse was hulle s’n. Israel het sy eie troepe in gevaar gestel om hierdie waarskuwings uit te reik – dit was dus die korrekte optrede.

Deuteronomium / Devarim {28:1} “As jy dan goed luister na die stem van die HERE jou God om sorgvuldig te hou al sy gebooie wat ek jou vandag beveel, dan sal die HERE jou God jou die hoogste stel bo al die nasies van die aarde. {28:2} En al hierdie seëninge sal oor jou kom en jou inhaal as jy luister na die stem van die HERE jou God. {28:15} Maar as jy nie luister na die stem van die HERE jou God, om sorgvuldig te hou al sy gebooie en sy insettinge wat ek jou vandag beveel nie, dan sal al hierdie vloeke oor jou kom en jou inhaal. {28:20} Die HERE sal teen jou stuur die vervloeking, die verwarring en die bedreiging in alles waar jy jou hand aan slaan, wat jy moet doen; totdat jy verdelg is en totdat jy gou tot niet gaan vanweë die boosheid van jou handelinge, dat jy My verlaat het.”

Net soos die Egiptenare moes besluit om God se waarskuwings te gehoorsaam – aldan nie – en sowel hulle lewens as dié van hul vee te red, net so moes die inwoners van Gaza-stad besluit of hulle aan die waarskuwings van die Israeli-Verdedigingsmag sou gehoor gee en in hul huise bly; eweneens moet ons ook besluit of ons God se waarskuwing gaan gehoorsaam. God het ons in Sy Woord – hierbo aangehaal – gewaarsku, deur aan ons die gevolge van gehoorsaamheid of ongehoorsaamheid aan Sy gebooie, uiteen te sit. Dit is dus nou vir óns om te besluit wat ons gaan doen! God sal nie aanspreeklik wees indien ons die verkeerde besluit neem nie: die keuse berus by ons.

Daar is ‘n kritieke vermaning in die Skrif, wat ek ten slotte met julle wil deel: dit is ‘n waarskuwing waarop ons almal moet agslaan en dit gehoorsaam. Ek glo dat dit die finale waarskuwing deur God is:

Johannes / Yochanan {14:6} “Jesus antwoord hom: Ek is die weg en die waarheid en die lewe; niemand kom na die Vader behalwe deur My nie.”

1 Johannes / Yochanan Aleph {2:23} “Elkeen wat die Seun loën, het ook nie die Vader nie.”

Noudat julle hierdie vermaning het, wat gaan julle daaromtrent doen? Die keuse berus by julle.

Congregation Melech Yisrael alle regte voorbehou