Lewe in - of sonder die Teenwoordigheid van God

Pesach

(Pasge)

Eksodus / Shemot 33:12-34:26

Numeri / BaMidbar 28:19-25

Eségiël / Yechezekiel 36:37-37:14

1 Korinthiërs / Korintim Aleph 5:6-8

Eksodus {33:14}  "En Hy antwoord: Moet Ek self meegaan om jou die rusplek te verskaf? {33:15}  Toe sê hy vir Hom: As U nie self meegaan nie, laat ons dan nie hiervandaan optrek nie. {33:16}  Want waaraan sou dan bekend word dat ek genade in u oë gevind het, ek en u volk? Is dit nie daaraan dat U met ons saamtrek nie? So sal ons, ek en u volk, onderskeie wees van elke volk wat op die aarde is."

Moses het die invloed van God se teenwoordigheid op die lewens van die kinders van Israel terdeë besef. Daarsonder sou hulle wees soos al die ander volkere op aarde. Moses het inderdaad ondervind hoe dit was om onder ander nasies te leef, waar die teenwoordigheid van God ontbreek het. Hy het in Egipte en Midian gewoon en dit gevolglik eerstehands beleef waaroor dit by afgodsdienstige nasies gaan. Nou, na sy ervaring by die brandende doringbos op die bergtop, wou hy nooit weer terugkeer na waar hy sonder God se teenwoordigheid sou wees nie. Dit is dus verstaanbaar waarom Moses so verbind was aan God en so passievol was oor die verhouding wat hy met Hom gehad het, dat hy hoegenaamd nie bereid was om êrens heen te gaan as die teenwoordigheid van God nie saam met hom gegaan het nie. Onthou julle die rede wat hy aangevoer het vir God se teenwoordigheid by die kinders van Israel? "So sal ons, ek en U volk, onderskeie wees van elke volk wat op aarde is.". Moses het geweet dat die teenwoordigheid van God in mense se lewens, hulle anders gemaak het; inderdaad so verskillend, dat dit hulle anders as enige ander volk op aarde sou maak.

Wat beteken dit dus om in die teenwoordigheid van God te leef? Wanneer ons in Sy teenwoordigheid is, word Hy ons passie, ons fokuspunt. Daar is krag in God se teenwoordigheid. Die kinders van Israel sou dus geen ander volk hoef te vrees nie omdat, solank hulle in die teenwoordigheid van God was, niemand hulle sou kon verslaan nie. Daar is geen vrees in Sy teenwoordigheid nie, maar wel berou, vergifnis en verandering van karakter. Daar is ook waarheid, leiding, onderrig, profetiese openbaring, berusting en volkome vrede in God se teenwoordigheid. Dit was geen wonder dat Moses nie sonder die teenwoordigheid van God wou wees nie. Sou jy?

Op hierdie Sabat vier ons die eerste oorgang (of tussenkomende) dag van Paasfees. Vir ons gaan dit alles om die dood en opstanding van Jesus, die Messias. Elke element van die Paas-seremonie, beskrywe op een - of - ander wyse wat ons Messias vir ons gedoen het. Waarom moes die Messias aarde toe kom en sterf? Hy móés kom en sterf sodat ons gered kan word, maar ook om die volgende rede:

Johannes / Yochanan {16:7}"Maar Ek sê julle die waarheid: Dit is vir julle voordelig dat Ek weggaan; want as Ek nie weggaan nie, sal die Trooster nie na julle kom nie; maar as Ek weggaan, sal Ek Hom na julle stuur; "

Vóór Jesus die Messias - God wat in die vlees na die aarde gekom het in menslike vorm - was die kinders van Israel sonder 'n profeet, selfs sonder die teenwoordigheid van God; Sy teenwoordigheid het van die tempel uitgegaan, soos deur die profeet, Esegiël, beskrywe in hoofstukke 10 en 11 van sy boek. Uiteindelik, na meer as vierhonderd jaar, het die Messias gekom en was die kinders van Israel weereens in die teenwoordigheid van God.

Jesus was egter op die punt om te vertrek. Hy moes Sy plek in die hemel inneem sodat Hy 'n belangrike deel in ons en die wêreld se verlossingsproses kon volbring, maar dié keer sou God ons nie sonder Sy teenwoordigheid laat nie. Hy sou die Heilige Gees stuur om met ons te wees.

Johannes / Yochanan {14:16} "En Ek sal die Vader bid, en Hy sal julle ‘n ander Trooster gee om by julle te bly tot in ewigheid"

Almal wat in Jesus die Messias glo, het die teenwoordigheid van God binne in hulle, "...So sal ons, ek en u volk, onderskeie wees van elke volk wat op die aarde is.". Kan julle waarlik sê dat julle 'n volkome ander lewe lei? 

Kom gou Jesus!

PDF weergawe

Voorheen uitgegee: 2009-04-11

Is Reinigheid naas Godvresendheid

Tazria-Metzora

(Sy Bring Saad Voort - Besmet)

Levitikus / VaYikra 12:1-15:33
Jesaja / Yesha'yahu 66:1-24
1 Petrus / Kefa Aleph / 2:4-10

Levitikus / Vayikra {13:34} “Bekyk die priester dan die skurfte op die sewende dag en sien hy dat die skurfte nie in die vel versprei het nie en dit nie dieper as die vel lyk nie, dan moet die priester hom rein verklaar. En hy moet sy klere was en sal rein wees.”

Levitikus / Vayikra {13:58} “Maar die kledingstuk of die skeerdraad of die inslag of enige leervoorwerp wat jy was — as die plek daaruit verdwyn het, moet dit nog ’n keer gewas word, en dit sal rein wees.”

Levitikus / Vayikra {14:7} “En hy moet op hom wat van die melaatsheid gereinig moet word, sewe maal sprinkel en hom reinig, en die lewendige voël moet hy oor die oop veld laat wegvlieg.  {14:8} Dan moet hy wat gereinig moet word, sy klere was en al sy hare afskeer en ‘n bad neem; dan sal hy rein wees. En daarna kan hy in die laer kom, maar hy moet sewe dae lank buitekant sy tent bly. “

Levitikus / Vayikra {15:4} “Elke bed waar hy op lê wat die vloeiing het, sal onrein wees; en alles waar hy op sit, sal onrein wees.  {15:5} En elkeen wat aan sy bed raak, moet sy klere was en ‘n bad neem en hy bly tot die aand toe onrein”

Hierdie week se Tora-lesing is 'n dubbele deel, maar beide gedeeltes handel primêr oor dieselfde aangeleentheid en dit is naamlik of 'n lid van die samelewing van Israel in 'n toestand van rituele reinheid ("tahor") of rituele onreinheid ("tamei") verkeer.

Ek het twee Skrifgedeeltes van elk van hierdie week se oordenkingslesings gekies. Elkeen het betrekking op die was van 'n persoon se klere as deel van die proses om ritueel rein te word. Daar is ander gedeeltes in hierdie lesings wat handel oor die reiniging van die liggame van diegene wat ritueel rein verklaar is.

Indien julle hierdie oordenking in geheel gelees het , sal julle seker merk dat dit 'n saak van onmoontlikeid sou wees vir enigeen in Israel om in 'n staat van totale rituele reinheid te verkeer. Om die waarheid te sê, ten einde vir enigeen om ritueel te bly verkeer, sou dit beteken het dat niemand aan mekaar durf raak nie, uit vrees om ritueel onrein te word. Die praktyk wat ons nou beoefen om te omhels of hande te skud sou uit noodsaak taboe gewees het.

Ongeag die fisiese aspekte van om ritueel rein te wees, was daar natuurlik spirituele betekenis aan al hierdie opdragte wat God Moses gegee het. Indien julle egter daarin belangstel om meer daaroor te wete te kom, kan daar verwys word na vorige jare se lesings vanuit beide hierdie oordenkings.

By die lees van hierdie twee Toragedeeltes is dit baie maklik om te dink "Wat 'n kille, emosielose, uitdrukkinglose samelewing moes dit gewees het om nie die fisiese kontak te kon hê nie", en as julle nie die beginsel agter God se opdragte verstaan het nie, sou julle beslis reg gewees het. Ek betwyfel dit egter sterk dat die mense koud was en nie aan mekaar geraak het nie. Ek is oortuig dat hulle wel omhels, hande vasgehou en emosies fisies uitgedruk het.

Romeine / Romim {16:16} “Groet mekaar met ‘n heilige kus.”

Sou Paulus, wat homself bewys het om Tora-gesentreerd te wees in elk van ons studies, hierdie opdrag gegee het indien 'n Bybelse Toragesentreerde samelewing 'n beleid van geen kontak gehad het nie? Ongelukkig hang ultra-ortodokse Joodse sektes, in hul fanatisme, foutiewelik 'n "moenie aanraak" - teologie aan. Hul raak nie aan of skud hande met vreemde vrouens nie omdat hulle nie weet of diegene menstrueer of nie. Indien God dus nie wil hê dat ons fanaties oor Sy opdragte moet wees nie, waaroor gaan al hierdie opdragte dan? Wel, anders as die feit dat hierdie opdragte van rituele reinheid en onreinheid tempelafhanklik was en aangesien daar geen tempel meer is nie, is dit vandag nie meer van toepassing nie. Nietemin is daar vir ons 'n belangrike les hier uit te leer en dit is die voorskrif van reinheid.

Met al die voorgeskrewe gebooie oor reiniging van liggame en klere wanneer iemand met 'n ander persoon, wat ritueel onrein is, in aanraking kom, dan moes die mense asook hul klere skoon (rein) wees. Meeste van ons het al die cliché: "Reinheid naas Godvresendheid" gehoor, maar eintlik is dit veel gewigter as 'n cliché; trouens , dit is 'n Bybelse feit!

Ek is nie vertroud met die sindelikheidsgewoontes van die Kanaäniete, die Hetiete en ander stamme en nasionaliteite wat die kinders van Israel onteien het nie, maar te oordeel aan hierdie opdragte en met ons beperkte kennis van God, sou Hy nie vir die kinders van Israel hierdie gebooie gegee het indien hulle obsessief skoon was nie. Onsindelikheid / onreinheid veroorsaak en versprei siektes, wat deur hierdie gebod van God bedoel is om uitgeskakel te word. Dus, ja: "Reinheid naas Godvresendheid", en om jouself daagliks te reinig, is inderdaad Bybels, net soos die daaglikse was van ons klere.

Kom gou Jesus!

PDF weergawe

Voorheen uitgegee: 2009-04-25

Is God Besig om "Vreemde Vuur" na jou te roep?

Shemini 

(Agtste)

Levitikus / VaYikra 9:1-11 :47

2 Samuel / Sh'muel Bet 6:1-7:17

Handelinge / Ma'asei 7:1-19

Levitikus / Vayikra {10:1} “En die seuns van Aäron, Nadab en Abíhu, het elkeen sy vuurpan geneem en vuur daarin gegooi en reukwerk daarop gesit en vreemde vuur voor die aangesig van die HERE gebring, wat Hy hulle nie beveel het nie. {10:2} Daarop het daar vuur van die aangesig van die HERE uitgegaan en hulle verteer, en hulle het gesterwe voor die aangesig van die HERE.”

Die dood van Aaron se twee seuns, Nadab en Abihu, so tragies soos dit ookal was, verleen krag aan die opdrag wat God aan Aaron gegee het.

Levitikus / Vayikra {10:8} “En die HERE het met Aäron gespreek en gesê: {10:9} Moenie wyn of sterk drank drink nie, jy of jou seuns saam met jou as julle in die tent van samekoms ingaan, dat julle nie sterwe nie; ‘n ewige insetting is dit vir julle geslagte; {10:10} en julle moet onderskeid maak tussen wat heilig en wat onheilig, en tussen wat onrein en wat rein is; {10:11} en julle moet die kinders van Israel leer al die insettinge wat die HERE deur die diens van Moses aan hulle verkondig het.”

Die twee sterftes het aan Aaron, God se aangestelde en gesalfde hoëpriester, getoon dat Hy geen onreinheid in Sy teenwoordigheid duld nie. Hy sou ook geen opstand of ongehoorsaamheid duld nie. Aangesien God dieselfde is gister, vandag en tot in ewigheid, moet ons as priesters van die Here, uiters versigtig wees om ook voor God eerlik en opreg te wandel. Hy sal ons miskien nie daar en dan met die dood tref, soos vir Nadab en Abihu, nie maar die gevolge van ons sonde, sal net so seker wees.

Die uitdruklike opdrag van God oor hoe Aaron moes funksioneer in die Heilige van Heiliges en die dood van sy twee seuns het die boodskap wat God wou tuisbring, baie duidelik uitgespel: Sy opperste heiligheid en die mens se volslae sondigheid. Wat sal dit neem dat ons ook die boodskap ten volle begryp? Ek hoor steeds dat mense na "die grootman in die lug" of "die ou daarbo" verwys. Word God se heiligheid deur sulke praatjies verklaar? Ek sidder altyd wanneer ek hoor hoedat mense na God verwys. Ek vrees om te naby hulle te wees, vir ingeval hulle deur weerlig getref en dit ook na my toe opslaan. God verdra dit nie en sal nie ons onheilige woorde of dade teenoor Hom verduur nie.

Spreuke / Mishlei {16:25} "Daar is ‘n weg wat vir ‘n mens reg lyk, maar die einde daarvan is weë van die dood."

Baie mense beweer dat alle godsdienste goed is en daar vele maniere is om by God uit te kom, maar ek sê, sonder die geringste twyfel in my gemoed, dat dit 'n leuen uit die hel is. Daar is slegs één weg na God, en dit is Sy weg. Alle ander weë lei na die verderf. Iemand wat tot God bid, maar nie volgens Sy weg - dit is Jesus - tot hom kom nie, nader God op 'n vreemde wyse, wat nie vir Hom aanvaarbaar is nie. Juis dit was die sonde van Nadab en Abihu. Hulle het hulle aan God opgedring, oftewel Hom op hul wyse genader, en tragies genoeg, is dit die sonde wat tans in sinagoges regoor die wêreld gepleeg word. Hulle probeer om God te nader deur weldade , uitgerekte liturgiese gebede en liefdadigheid. In werklikheid offer hulle vreemde vuur aan God. Hy het ons nie geleer dat daar slegs één weg tot Hom en dit is deur bloed:

Hebreërs / Ivrim {9:22} "En byna alles word met bloed gereinig volgens die wet, en sonder bloedvergieting vind daar geen vergifnis plaas nie."

God het dit baie duidelik aan Aaron gestel: Wees versigtig dat jy nie op jou manier tot My nader nie anders sal jy sterf. Bid asseblief vir die verlore skape van die huis van Israel!

Levitikus / Vayikra {10:1} "En die seuns van Aäron, Nadab en Abíhu, het elkeen sy vuurpan geneem en vuur daarin gegooi en reukwerk daarop gesit en vreemde vuur voor die aangesig van die HERE gebring, wat Hy hulle nie beveel het nie."

Let op wat God hier gesê het "...wat Hy hulle nie beveel het nie". Dit was nie enige gewone ongehoorsaamheid nie. God het hulle duidelik beveel wat hulle nie moes doen nie. Gevolglik was dit eiesinnige en opsetlike ongehoorsaamheid. Wie van ons wat dit vandag lees, ken die gebooie van God, weet wat Hy van ons verlang maar gee nie gehoor daaraan nie? Indien dit jy is, weet dan dat dit eiesinnigheid en opsetlike ongehoorsaamheid van jou kant is. Diegene van ons vir wie dit geld, moet ernstig op ons lewens let. Waar is ek nou? Wat gebeur in my huis of gesin? Maak 'n eerlike opname en onthou dan dat God 'n verterende vuur is en wat Hy verteer, is die ongehoorsames, selfsugtiges en onvergewensgesindes; Hy verteer haat, onversetlikheid, luiheid asook owerspelers, ontugtiges en leuenaars, om 'n paar sondes te noem.

Hebreërs / Ivrim {12:25} "Pas op dat julle Hom wat spreek, nie afwys nie; want as húlle nie ontvlug het nie wat Hom afgewys het toe Hy op aarde ‘n goddelike waarskuwing gegee het, veel minder óns wat ons van Hom afkeer nou dat Hy uit die hemele spreek."

Dit is een van die grootste sondes van ons tyd: Mense gee nie gehoor aan wat God spreek nie. Die hedendaagse mense wil dinge op hul eie manier doen, maar wat hulle in werklikheid doen is om God in hul eie afbeelding te skep. Die media sê: "Doen jou eie ding". Die wêreld verkondig aan ons: "As dit goed voel, doen dit" Die sportindustrie moedig ons aan: "Doen dit net" God sê egter: "Vreemde Vuur! Vreemde Vuur!" Wie gaan jy glo?

Kom gou Jesus!

PDF weergawe

Voorheen uitgegee: 2009-04-18