Ofskoon dit vandeesweek ‘n dubbele lesing, oftewel twee parashot is, het ek egter my kommentaar slegs tot parasha Vayachel beperk.
Eksodus {35:10} “En almal wat kunsvaardig is onder julle, moet kom en alles maak wat die HERE beveel het: {35:11} die tabernakel, sy tent en sy dekkleed, sy hakies en sy style, sy dwarshoute, sy pilare en sy voetstukke; {35:12} die ark en sy draaghoute, die versoendeksel en die voorhangsel tot bedekking; {35:13} die tafel met sy draaghoute en al sy gereedskap, en die toonbrode; {35:14} en die kandelaar tot verligting, met sy gereedskap en sy lampe, en die olie vir die kandelaar; {35:15} en die reukaltaar met sy draaghoute, en die salfolie en die reukwerk van speserye, en die bedekking vir die ingang van die tabernakel; {35:16} die brandofferaltaar met sy traliewerk van koper, sy draaghoute en al sy gereedskap; die waskom met sy voetstuk; {35:17} die behangsels van die voorhof, sy pilare en sy voetstukke, en die bedekking van die poort van die voorhof; {35:18} die penne van die tabernakel en die penne van die voorhof met hulle lyne; {35:19} die kunstige klere om in die heiligdom te dien, die heilige klere vir die priester Aäron en die klere van sy seuns om die priesteramp te bedien.”
Nadat ek hierdie parasha gelees het, kan ‘n mens verstaan wat God bedoel het toe Hy gesê het dat Hy die mens na Sy beeld geskep het. Benewens al ons ander ooreenkomste, kan ons sien wat maak óns soos ons Hemelse Vader: ons is skeppers. Die enigste verskil tussen ons en God, wat skepping betref , is dat God iets uit niks kan skep, terwyl ons daarenteen slegs uit dit wat God reeds geskep het, iets kan skep.
God het, volgens hierdie parasha, Moses beveel om die rou boumateriaal bymekaar te maak, wat nodig sou wees om vir Hom ‘n woning te bou sodat Hy te midde van Sy volk kon wees. God se bedoeling, toe en selfs nou nog, was om onder Sy volk te woon. Sy gevoel hieroor is so sterk, dat Hy eendag – trouens binnekort – in die gedaante van Sy Seun Jesus die Messias, sal terugkeer om presies dít te doen.
Dit is interessant om te besef dat God, die Skepper van iets uit niks, met respek gesê, deur slegs Sy vingers te klap of ‘n enkele woord te spreek, vir Homself uit niks ‘n woning kon skep, netsoos Hy die heelal geskep het. Hy kon selfs deur Sy wil ‘n woning laat ontstaan het waarin Hy kon woon; tóg het Hy dit nie gedoen nie. In plaas daarvan, het hy verkies dat die kinders van Israel dit vir Hom doen. Hier is vir my twee beginsels van krag, wat ek as deel van my kommentaar vir hierdie parasha sal verduidelik. Albei beginsels verwys na waarom God verkies het dat die kinders van Israel die tabernakel (Mishkan) bou, pleks dat Hyself dit laat ontstaan het.
Die eerste beginsel:
Spreuke {13:11} “Goed wat uit niks verkry is, word minder; maar hy wat met die hand bymekaarmaak, kry altyd meer.”
Hierdie spreuk, soos ons kan sien, het betrekking op die verkryging van geld wat nie deur arbeid verdien is nie, dikwels “swerfgeld” genoem en wat dié spreuk eintlik sê, is dat geld wat nie deur arbeid bekom is nie, net so gou verdwyn as wat dit bekom is. Dus kan dieselfde beginsel geld vir enigiets wat ons nie deur harde werk bekom of werklik verdien het nie. Kom ons wees maar eerlik: dit is deel van ons menslike natuur! Ons waardeer en versorg slegs dít waarvoor ons hard moes werk, méér as dit wat aan ons gegee is, sonder dat ons iets daarvoor hoef te gedoen het. Ongelukkig sluit dit vir sommige mense selfs hul verlossing in. Dit is waarom daar soveel werk-georiënteerde godsdienste en kultusse is. Hierdie aspek van ons natuur, glo ek, is ‘n gevolg van die sondeval van die mens (Adam en Eva).
Genesis {3:17} “En aan die mens het Hy gesê: Omdat jy geluister het na die stem van jou vrou en van die boom geëet het waarvan Ek jou beveel het om nie te eet nie—vervloek is die aarde om jou ontwil; met moeite sal jy daarvan eet al die dae van jou lewe. {3:18} Ook sal dit vir jou dorings en distels voortbring; en jy sal die plante van die veld eet. {3:19} In die sweet van jou aangesig sal jy brood eet totdat jy terugkeer na die aarde, want daaruit is jy geneem. Want stof is jy, en tot stof sal jy terugkeer.”
Die tweede beginsel:
1 Korinthiërs {3:7} “So is dan hy wat plant of hy wat natmaak, niks nie, maar God wat laat groei. {3:8} Maar hy wat plant en hy wat natmaak, is een, maar elkeen sal sy eie loon volgens sy eie arbeid ontvang. {3:9} Want ons is medewerkers van God; die akker van God, die gebou van God is julle.”
God begeer ons vennootskap met Hom. Alhoewel Hy by magte is om alles sonder ons te doen, is die eintlike rede waarom Hy ons geskep het, om Sy vennote te wees op die aarde wat Hy vir ons geskep het. Deur die opstanding en Sy toekomstige wederkoms, sal ons saam met Jesus in die heelal regeer.
Openbaring {20:6} “Salig en heilig is hy wat deel het aan die eerste opstanding; oor hulle het die tweede dood geen mag nie, maar hulle sal priesters van God en van Christus wees en sal saam met Hom as konings regeer duisend jaar lank.”
Dit is dus, om hierdie twee redes, wat ek glo, God die kinders van Israel laat deelneem het aan die konstruksie van die tempel.
Eksodus {35:4} “Verder het Moses die hele vergadering van die kinders van Israel toegespreek en gesê: Dit is die saak wat die HERE beveel het: {35:5} Neem van julle besittings ‘n offergawe aan die HERE. Laat elkeen wat gewillig is in sy hart, dit bring, die offergawe van die HERE: goud en silwer en koper;”
Ons, wat in Jesus die Messias glo, is nou die tempel van God, waarin die Gees van God woon. Daarom is dit steeds die verantwoordelikheid van elke gelowige in Jesus die Messias om God se koninkryk te bou, deur getuienis en die evangelie van verlossing. Ek vertrou dat God in jou ‘n gewillige hart sal vind!
Kom gou Jesus!
