Denkbeeldige Strepe

Toldot

(Geslagte)

Genesis / Bereshit 25:9 – 28:9

Maleagi / Malachi 1:1–2:7 

Romeine / Romim 9:1 – 13

Genesis / B’Reshet {26:6} "So het Isak dan in Gerar gebly. {26:7} En toe die manne van die plek hom na sy vrou vra, antwoord hy: Sy is my suster. Want hy was bang om te sê: My vrou — anders sal die manne van die plek, so het hy gedink, my miskien doodmaak ter wille van Rebekka; want sy was mooi van aansien. {26:8} En toe hy al ’n lang tyd daar was, kyk Abiméleg, die koning van die Filistyne, deur die venster uit en sien hoe Isak speel met Rebekka, sy vrou. {26:9} En Abiméleg het Isak geroep en gesê: Kyk, sy is dan tog jou vrou! Hoe kon jy dan verklaar: Sy is my suster? En Isak antwoord hom: Ja, ek het gedink ek kan miskien om haar ontwil my lewe verloor! {26:10} En Abiméleg sê: Wat het jy ons nou aangedoen? Hoe maklik kon een van die mense met jou vrou gemeenskap gehad en jy ’n skuld oor ons gebring het!"

Die “Ek Ook” - beweging in onlangse tye, het beklemtoon hoe boos en immoreel die wêreld is waarin ons vandag lewe. Die wêreld was egter so vanaf die begin van tyd. Op één tydstip was dit so erg dat die Here die hele mensdom moes vernietig deur ‘n vloed en slegs ses mense is geskik bevind om dit te oorleef. Ons weet nie presies wat die mate van boosheid was waarin die wêreld toe verkeer het nie. Dit moes veel erger gewees het in vergelyking met wat ons vandag verduur dat die Here so drasties opgetree het. Boosheid van hierdie omvang, sal egter weer die aarde teister; dit sal ‘n boosheid wees wat die Here sal besiel om die ganse aarde te vernietig, maar hierdie keer met vuur.

2 Petrus / Kefa Bet {3:10} "Maar die dag van die Here sal kom soos ’n dief in die nag, waarin die hemele met gedruis sal verbygaan en die elemente sal brand en vergaan, en die aarde en die werke wat daarop is, sal verbrand.{3:11} Terwyl al hierdie dinge dan vergaan, hoedanig moet julle nie wees in heilige wandel en godsvrug nie? — {3:12} julle wat die koms van die dag van God verwag en verhaas, waardeur die hemele deur vuur sal vergaan en die elemente sal brand en versmelt."

Ten spyte van die boosheid in die wêreld sedert die tyd van Adam en Eva, dui die gedeeltes in Genesis 26:6-10 aangehaal, dat daar altyd in een of ander vorm, ‘n skyn van moraliteit was. Koning Abimeleg was ‘n Filistyn ‘n afgod-aanbidder en het beslis nie geweet of geglo in die God van Israel nie, maar tog vind ons in hierdie Parasha die volgende verklaring deur hom aan Isak:

Genesis / B’reshet {26:10} "En Abiméleg sê: Wat het jy ons nou aangedoen? Hoe maklik kon een van die mense met jou vrou gemeenskap gehad en jy ’n skuld oor ons gebring het!"

Voordat ek in Jesus die Messias geglo het, was my lewe gevul met allerlei sondige dade; moreel, finansieel en spiritueel (deur spiritueel, bedoel ek dat ek by die okkult betrokke was). Nietemin, ten spyte van my onskuldige aard, was daar dinge, beslis sondige dade (dinge wat my vriende gedoen het), wat ekself nooit sou gedink het om te doen nie of selfs gedink het om in dáárdie tyd te doen nie. Ek was immoreel, oneties en sondig, tog sou ek neergekyk het op mense wat dinge gedoen het wat ek gedink het ek nooit sou doen nie. So onskuldig (naief) soos wat ek was, het ek egter gevind dat ek dit eindelik tog ook sou doen.

Die Filistyne was ‘n bose, moordadige, immorele volk. Tog lees ons hier oor iets wat hulle nie sou doen nie of tenminste, koning Abimeleg gedink hy nie sou doen nie.Hy het geweier om by ‘n ander man se vrou te slaap. Is dit nie netsoos ons is om ons morele, etiese en spirituele perke te kies en keur nie? “Ek sal dít doen, maar nooit dát nie. Ek sal mense op hierdie wyse behandel, maar nooit op daardie wyse nie. Ek sal nooit soos so en so wees of doen wat hulle doen nie. Dan sowat ‘n jaar of twee later, vind ons dat ons presies doen wat ons in die verlede as ondenkbaar beskou het. Dit is hoedat sonde te werk gaan - dit is hoe die Satan op ons inwerk! 

Die enigste wat hierdie sondesiklus kan breek (dit het vir my gewerk), is om Jesus die Messias as julle Heer en Redder aan te neem: “Heer”, deur julle lewe aan Hom oor te gee en “Redder”, deur Hom met julle siele te vertrou. Dit is die enigste hoop wat enigeen het om bevry te word van ‘n lewe van morele, etiese en spirituele boosheid.

Beskou jy jouself as nie juis so’n slegte persoon nie? Moontlik is dit omdat jy jouself met ander slegte mense vergelyk in plaas daarvan om jouself met God en Sy norm, soos in Sy Bybel uiteengesit, vergelyk. In die verlede het ek myself ook met ander vergelyk en myself as ‘n nie te slegte persoon beskou nie. Ek het myself oortuig dat ek nie sulke vreeslike dinge soos my vriende en kennise sou doen nie, maar tog gevind dat ek dit wel doen. Ek sou waag om te sê dat dít is wat die moordadige afgodsaanbidder, Abimeleg, miskien van homself gedink het toe hy Isak bersipe en die streep getrek het deur nie by ‘n ander man se vrou te slaap nie. Ongelukkig is dít wat baie mense doen; hulle trek denkbeeldige strepe ten opsigte van hulle eie moraliteit totdat hulle sonde in die lig van Jesus blootgelê word. Dit is dán wanneer hulle besef dat hulle intussen hulself bedrieg het. 

Kom gou Jesus!

PDF weergawe

Geestelike Geaardhede – Goed en Kwaad

Toldot

(Geslagte) 

Genesis / Bereshit 25:9 – 28:9

Maleagi / Malachi 1:1–2:7

Romeine / Romim 9:1 – 13

Genesis / Bereshit {25:21} “En Isak het die HERE gesmeek met die oog op sy vrou, want sy was onvrugbaar; en die HERE het hom verhoor, sodat sy vrou Rebekka swanger geword het. {25:22} En die kinders het teen mekaar gestoot binne-in haar. Toe sê sy: As dit so gaan, waarvoor leef ek dan? Daarop het sy gegaan om die HERE te raadpleeg. {25:23} En die HERE het haar geantwoord: Twee nasies is in jou skoot, en twee volke sal van mekaar gaan uit jou liggaam; en die een volk sal sterker wees as die ander volk; en die oudste sal die jongste dien. {25:24} En toe haar dae vervul is dat sy moes baar, was daar ‘n tweeling in haar skoot. {25:25} En die eerste is gebore—rooi, geheel en al soos ‘n mantel van hare. Daarom het hulle hom Esau genoem. {25:26} En daarna is sy broer gebore, terwyl sy hand die hakskeen van Esau vashou. Daarom het hulle hom Jakob genoem. En Isak was sestig jaar oud by hulle geboorte.”

Ek vind dit baie interessant dat God ons meedeel dat toe Esau (Esav) gebore is, hy heeltemal rooierig (en harig) was. Die rede hiervoor is dat die satan nog altyd voorgestel word as geheel-en-al in rooi geklee. Verstrek God dan aan ons, in die verhaal van Isak en Esau, ‘n beeld van die stryd tussen goed en kwaad, lig en duisternis, die gees en die vlees?

Daar het ‘n hewige stryd in Rebekka (Rivkah) se skoot plaasgevind en sy was nie daarvan bewus nie. Nadat die kinders egter gebore is op grond van Rebekka se optrede, soos verder aan in hierdie Parasha beskrywe – wil dit voorkom asof sy van die geestelike aard van die stryd tussen hierdie twee seuns bewus geraak het.

Ofskoon Jakob (Ya’acov) en Esau (Esav) ‘n tweeling was, kon dié twee nooit meer uiteenlopend van geaardheid gewees het nie. Esau was die algehele Amerikaanse tipe – wat ons in my jeugjare ‘n “jock” genoem het, terwyl Jakob méér, wat ons sou genoem het, ‘n “nerd” was. Is dit nie hoe die wêreld ons, as gelowiges in Jesus die Messias, sou beskou nie, dit wil sê as “nerds”, omdat hulle ons nie as “jocks” sien nie? Dit is omdat ons nie volgens wêreldse standaarde leef nie – wat die wêreld van hou, staan ons nie aan nie, ons is anders en heeltemal tereg ook – God verlang dat ons anders móét wees.

Esau en Jakob is presies die teenoorgestelde van mekaar; trouens, hulle is die klassieke voorbeeld van die verskil tussen ‘n gelowige en ‘n ongelowige, oftewel dié van die wêreld en dié wat ín die Here is. Esau verteenwoordig alles wat die wêreld aan waarde heg. Hy was iemand vir die buitelewe, ‘n bedrewe jagter, ‘n atletiese tipe mens. Hy het geen begrip van die geestelike dinge gehad of enigsins waarde daaraan geheg nie, wat duidelik geblyk het uit die feit dat sy eersgeboortereg vir hom niks beteken het nie. Jakob, daarenteen, word voorgestel as iemand met ‘n baie hegte verhouding met sy moeder, die ernstige gehoorsame tipe mens; iemand van die gees en nie van die wêreld nie, wat bewys is deurdat God hom uitgekies het as die bloedlyn waaruit die Messias sou kom. Alles waarvoor Jakob gestaan het, het Esau teëgestaan. Het jy opgemerk dat daar in die Skrif hoegenaamd geen aanduiding is dat Jakob ooit vir Esau gehaat het nie? Is dit nie soos wat dit ook nog tot vandag toe met ons gesteld is nie? Die wêreld is besig om al hoe meer teen ons te draai, verafsku ons en die beginsels wat ons handhaaf, maar dit is nie hoe ons teenoor die mense van die wêreld optree nie. Ons wil graag sien dat hulle gered word; derhalwe móét ons hulle liefhê ofskoon ons hoegenaamd nie aan hulle wêreldse strewes deelneem nie.

Die stryd tussen Jakob en Esau mag wel as ‘n fisiese stryd geblyk het maar dit was nie. Dit was ‘n geestelike stryd, tussen goed en kwaad, lig en duisternis, tussen die gees en die vlees – ‘n stryd wat tot vandag toe steeds voortwoed.

Efesiërs / Efesos {6:12} “Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug.”

Die dag sal kom en spoedig aanbreek wanneer Jesus die Messias weer sal kom en die duiwel – daardie slang wat die satan is – verslaan, sodat hy vir eenduisend jaar gebind sal wees.

Openbaring / Hitgalut {20:2} “En hy het die draak gegryp die ou slang wat die duiwel en die Satan is en hy het hom gebind duisend jaar lank, {20:3} en hom in die afgrond gewerp en hom toegesluit en dit bo hom verseël, sodat hy die nasies nie meer sou verlei totdat die duisend jaar voleindig is nie. Daarna moet hy dan ‘n kort tydjie ontbind word.”

Kom gou Jesus!

PDF weergawe

Voorheen uitgegee: 2011-11-20

Om Myself met Ander Te Vergelyk

Toldot

(Geslagte)

Genesis / Bereshit 25:9 – 28:9

1 Samuel / Sh’muel Aleph 20:18 - 42

Romeine / Romim 9:1 – 13

Om Myself met Ander Te Vergelyk

Genesis / Bereshit {26:6} “So het Isak dan in Gerar gebly. {26:7}  En toe die manne van die plek hom na sy vrou vra, antwoord hy: Sy is my suster. Want hy was bang om te sê: My vrou—anders sal die manne van die plek, so het hy gedink, my miskien doodmaak ter wille van Rebekka; want sy was mooi van aansien. {26:8}  En toe hy al ‘n lang tyd daar was, kyk Abiméleg, die koning van die Filistyne, deur die venster uit en sien hoe Isak speel met Rebekka, sy vrou. {26:9}  En Abiméleg het Isak geroep en gesê: Kyk, sy is dan tog jou vrou! Hoe kon jy dan verklaar: Sy is my suster? En Isak antwoord hom: Ja, ek het gedink ek kan miskien om haar ontwil my lewe verloor! {26:10}  En Abiméleg sê: Wat het jy ons nou aangedoen? Hoe maklik kon een van die mense met jou vrou gemeenskap gehad en jy ‘n skuld oor ons gebring het!”

Ons leef sonder twyfel in ‘n bose en immorele wêreld, maar dit was van die begin af reeds so; trouens, op ‘n bepaalde tyd was die wêreld so geweldadig, dat God die ganse mensdom – met die uitsondering van agt persone – deur ‘n vloed vernietig het. Ons weet nie welke mate van goddeloosheid daar in die wêreld geheers het nie, maar as God so ‘n drastiese stap geneem het, moes dit ongetwyfeld veel erger gewees het in vergelyking met dít waarin ons vandag lewe.

Volgens die Skrif, sal die sondigheid in hierdie omvang weer op aarde plaasvind – ‘n sondigheid waardeur God die hele wêreld in geheel sal vernietig, maar hierdie keer deur vuur.

2 Petrus / Kefa Bet {3:10} ”Maar die dag van die Here sal kom soos ‘n dief in die nag, waarin die hemele met gedruis sal verbygaan en die elemente sal brand en vergaan, en die aarde en die werke wat daarop is, sal verbrand. {3:11}  Terwyl al hierdie dinge dan vergaan, hoedanig moet julle nie wees in heilige wandel en godsvrug nie? — {3:12}  julle wat die koms van die dag van God verwag en verhaas, waardeur die hemele deur vuur sal vergaan en die elemente sal brand en versmelt.”

Die punt wat ek graag wil maak, is dat ten spyte van die feit dat die mensdom vanaf die tyd van Adam en Eva sondig was, daar tog altyd in die één of ander vorm, ‘n wet en ‘n skyn van moraliteit bestaan het.

Koning Abiméleg was ‘n Filistyn en het sekerlik nie in die God van Israel geglo nie; trouens, die Filistyne was afgodsaanbidders, maar in hierdie Parasha, vind ons tog dat hy vir Isak die volgende sê:

Genesis / Bereshit {26:10} ”En Abiméleg sê: Wat het jy ons nou aangedoen? Hoe maklik kon een van die mense met jou vrou gemeenskap gehad en jy ‘n skuld oor ons gebring het!”

Ek onthou dat, alvorens ek in Jesus die Messias geglo het, ek in allerlei sondige praktyke betrokke was: moreel, finansieel en spiritueel (met laasgenoemde bedoel ek dat ek by die okkult betrokke was).  Nietemin, ten spyte van my ontneemde geaardheid was daar dinge – sekere sondige praktyke (waarmee my vriende gemoeid was), waartoe ek myself nooit sover sou kon bring om mee te doen of selfs oorweeg om te doen nie. Ek was immoreel, oneties en sondig, maar het juis neergesien op mense wat dinge gedoen het, ofskoon ekself dit nooit sou doen nie. Eindelik, so ontneem as wat ek in sekere gevalle was, het ek besef dat ek tog maar ook dieselfde gedoen het.

Die Filistyne was ‘n sondige, wreedaardige, immorele nasie. Nietemin lees ons van iets wat hulle nie sou gedoen het nie of wat koning Abiméleg nie sou oorweeg het nie.Hy het naamlik ‘n grens gestel om nie by ‘n ander man se vrou te slaap nie.

Is dit nie maar net soos ons is om ons eie morele, etiese en spirituele perke te kies nie? “Ek sal dít doen, maar nooit dát nie. Ek sal só teenoor ander mense optree, maar hulle nie só behandel nie. Ek sal nooit soos so-en-so wees nie of doen wat hulle doen nie”. Die probleem is egter dat ‘n jaar of twee later, besef ons dat ons presies dieselfde doen wat ons in die verlede as ondenkbaar beskou het! Dit is die wyse waarop sonde te werk gaan – dit is hoe die satan met ons werk!

Die enigste uitweg om hierdie kringloop van sonde te verbreek (dit het vir my geslaag), is om Jesus die Messias as jou Here en Redder aan te neem, om jou lewe aan hom toe te vertrou en in Hom te glo as die Redder van jou siel. Dit is die enigste hoop wat jy het om van ‘n lewe van morele, etiese en spirituele sondigheid verlos te word.

Beskou jy jouself miskien nie as so ‘n slegte persoon nie? Moontlik is dit omdat jy jouself met ander slegte persone vergelyk in plaas daarvan om jouself met God en Sy maatstaf soos in Sy Bybel uiteengesit, te vergelyk. In die verlede het ek myself ook met ander mense vergelyk en ek voel geneë om te dink dat dit juis dít is, wat Abiméleg ook gedoen het.

Kom gou Jesus!

PDF weergawe

Voorheen uitgegee: 2010-10-30

Haat Vernietig Lewens

D’Var Torah

Geslagte – Toldot

Genesis / Bereshit 25:19 – 28:9

1 Samuel / Shmel Alef 20:18 – 42

Romeine / Romim 9:1 – 13

Genesis / Bereshit {27:41} “En Esau was Jakob vyandig gesind vanweë die seën waarmee sy vader hom geseën het, en Esau het in sy hart gedink: Die dae van die rou oor my vader is naby; dan sal ek my broer Jakob doodmaak. {27:42}  Maar toe hulle aan Rebekka die woorde van Esau, haar oudste seun, vertel, stuur sy en laat Jakob, haar jongste seun, roep en sê vir hom: Kyk, jou broer Esau sal hom op jou wreek deur jou dood te maak. {27:43}  My seun, luister dan nou na my: maak jou klaar, vlug tog na Haran, na my broer Laban, {27:44}  en bly ‘n rukkie by hom tot die woede van jou broer bedaar, {27:45}  tot die toorn van jou broer teen jou bedaar en hy vergeet het wat jy hom aangedoen het. Dan sal ek stuur en jou daar laat haal. Waarom moet ek julle altwee op een dag verloor?”.

In hierdie verhaal van Esau (Esav) en Jakob (Ya’acov) kan ons die uitwerking van haat op ‘n persoon se lewe sien asook die invloed daarvan op die lewe van iemand wat gehaat word.

Ons verneem hier dat Esau vir Jakob gehaat het. Ons weet ook dat Esau die vader van die Edomiete was, wat bygestaan en toegekyk het hoedat die Assiriërs duisende in Israel aangeval en doodgemaak het. Boonop het hulle gewag en die Israeliete wat van die Assiriërs probeer wegvlug, doodgemaak het. Dit is inderdaad te betreur om daaraan te dink dat Esau en Jakob bloedbroers was, wat vir mekaar moes lief gewees en gerespekteer het en liefde in daaropvolgende geslagte dus moes voortgeduur het. In plaas daarvan, het die haat van Esau teenoor Jakob egter voortgeduur en bestaan dit steeds tussen hulle geslagte tot vandag toe.

Die uitwerking van die haat het selfs verder gestrek: vanweë sy haat, is Esau vervreem van sy broer en uiteindelik ook van sy familie as gevolg van die heidense vroue met wie hy getroud is. Esau het die geloof van sy voorvader, Abraham, versaak en in afgodery verval. Omdat dwaling tot erger dwaling lei, het die godsdiens van Islam – met verloop van eeue – tot stand gekom en het die haat tussen Jode en Moslems gevolglik vererger.

Esau se haat het egter nie slegs ‘n invloed op hom en sy nageslag gehad nie maar ook op Jakob en sy nageslag. As gevolg van Esau se haat vir sy broer, moes Jakob vir sy lewe vlug en van daardie tyd af het Jakob vir Esau gewantrou. Volgens die Skrif het hierdie wantroue reeds geblyk toe die twee broers mekaar teëgekom het terwyl Jakob besig was om na Laban te vlug. Jakob het vir Esau laat weet dat hy hom in Seïr sou ontmoet, maar toe met sy gevolg in die teenoorgestelde rigting na Sukkot {Genesis 33:17} getrek. So het Esau se haat die lewe en besluite van Jakob beïnvloed, nadat hy met sy broer herenig is. Ongeag die feit dat hulle klaarblyklik versoen geraak het, het Jakob nogtans sy broer gewantrou. Hierdie wantroue het deur die nageslag van Jakob tot vandag bly bestaan.

Matthéüs / Mattityahu {5:21} ”Julle het gehoor dat aan die mense van die ou tyd gesê is: Jy mag nie doodslaan nie, maar elkeen wat doodslaan, moet verantwoording doen voor die gereg. {5:22}  Maar Ek sê vir julle dat elkeen wat vir sy broeder sonder rede kwaad is, verantwoording moet doen voor die gereg; en elkeen wat vir sy broeder sê: Raka! moet verantwoording doen voor die Groot Raad; en elkeen wat sê: Jou dwaas! moet verantwoording doen in die helse vuur.”

Laat hierdie verhaal van Esau en Jakob vir ons almal ‘n les inhou: ons haat teenoor enigiemand, sal nie slegs vir ons en die persoon vir wie ons haat beïnvloed nie maar ook in albei partye se toekomstige geslagte voortduur.

Johannes / Yochanan {13:34} “n Nuwe gebod gee Ek julle, dat julle mekaar moet liefhê; soos Ek julle liefgehad het, moet julle ook mekaar liefhê. {13:35}  Hieraan sal almal weet dat julle my dissipels is, as julle liefde onder mekaar het.”.

Congregation Melech Yisrael alle regte voorbehou

Jou Geboortereg Verag

11 November 2012 

D’Var Torah 

Geskiedenis – Toledot 

Genesis / Bereshit 25:19 – 28:9

Maleági / Malachi 1:1 – 2:7

Romeine / Romim 9:1 – 13

Genesis / Bereshit {25:30} “Toe sê Esau vir Jakob: Laat my tog sluk van die rooigoed daar, want ek is moeg. Daarom het hulle hom Edom genoem. {25:31} En Jakob antwoord: Verkoop eers jou eersgeboortereg aan my. {25:32} En Esau sê: Kyk, ek gaan sterwe, en wat baat die eersgeboortereg my dan? {25:33} Toe antwoord Jakob: Sweer eers vir my. En hy het vir hom gesweer en sy eersgeboortereg aan Jakob verkoop. {25:34} En Jakob het aan Esau brood en die kooksel lensies gegee; en hy het geëet en gedrink en opgestaan en weggegaan. So het Esau dan sy eersgeboortereg verag. ”. 

‘n Mens is alte geneig om Esau te kritiseer oor so ’n dwaasheid soos om sy geboortereg te verkoop. Hy was ongetwyfeld honger, maar was hy werklik tot die dood toe honger? Ek dink nie so nie! Na my mening het sy vlees bloot die oorhand oor hom gekry. Die lensie gereg het heerlik geruik, smaaklik gelyk en hy was honger. Sommige mense sal enigiets sê om te verkry wat hulle wil hê. Kan julle eerlik sê dat julle dit nog nooit gedoen het nie? Boonop is ek seker dat Jakob in hierdie omstandigheid ook nie geheel-en-al onskuldig was nie; trouens, hy het nie sommer uit die bloute met die “verkoop aan my jou geboortereg”-eis gekom nie. Dit was iets waaraan hy waarsynlik lankal reeds gedink en moontlik beplan het. Ek is daarvan oortuig dat Esau nie doelbewus sy geboortereg verag het nie, andersins sou hy daarna nie so berou oor sy daad gehad het en woede teenoor sy broer gekoester het nie. Anders as in die geval van Jakob, was dit met Esau ‘n besluit wat hy impulsief geneem het. Dit is egter nie die punt wat ek wil maak nie: die punt is dat versoeking die oorhand oor Esau gekry en hy gevolglik dadelik daaraan toegegee het. 

Dink gerus daaroor na aangesien hierdie presiese scenario sigself moontlik herhaaldelik vandag in die lewens van gelowiges in Jesus die Messias afspeel. Miskien het dit selfs met julle al gebeur! Wanneer ons in Jesus die Messias weergebore word, ontvang ons ‘n geboortereg. Daardie geboortereg is verlossing wat die belofte van ewige lewe inhou terwyl ons die wedren van ons geloofslewe aflê, met die vaste voorneme om te oorwin. 

1 Korinthiërs / Korintim Aleph {9:24} “Weet julle nie dat die wat op die baan hardloop, wel almal hardloop, maar dat een die prys ontvang nie? Hardloop só dat julle dit sekerlik kan behaal. {9:25} En elkeen wat aan ‘n wedstryd deelneem, onthou hom in alles—húlle nogal om ‘n verwelklike krans te ontvang, maar ons ‘n onverwelklike. {9:26} Ek hardloop dan soos een wat nie onseker is nie; ek slaan met die vuis soos een wat nie in die lug slaan nie. {9:27} Maar ek kasty my liggaam en maak dit diensbaar, dat ek nie miskien, terwyl ek vir ander gepreek het, self verwerplik sou wees nie.”. 

Sommige van ons kom egter maklik in versoeking. Net soos Esau, gee ons toe aan die begeerte van ons oë en ons vlees, veral in tye van swakheid. Juis om dié rede, leer ons hier by Melech Yisrael om jouself nooit in situasie te laat beland wat daartoe mag lei dat jy in gevaar verkeer om aan versoeking toe te gee nie. Enkellopendes van die teenoorgestelde geslag behoort nooit saam alleengelaat te word nie, selfs nie eers verloofdes nie. ‘n Getroude persoon behoort ook nooit sonder sy / haar gade alleen in die geselskap van ‘n persoon van die teenoorgestelde geslag te verkeer nie, of dié persoon nou ookal getroud is aldan nie. In elke situasie moet ons op ons hoede wees om nie in versoeking gestel te word of selfs die indruk van boosheid te skep nie. 

1 Petrus / Kefa Aleph {5:8} “Wees nugter en waaksaam, want julle teëstander, die duiwel, loop rond soos ‘n brullende leeu, en soek wie hy kan verslind. ”. 

Talle gelowiges in Jesus die Messias het al aan versoeking toegegee en hulle geboortereg vir seks, geld, ‘n partytjie, dwelms, ens. verkoop. Hulle het geensins beplan om hulle geboortereg te verkoop nie – dit het soos in Esau se geval op die ingewing van die oomblik plaasgevind. Kom ons leer iets hieruit: Nadat Esau sy geboortereg verkoop het, kon hy dit nie terugkry nie, dit was te laat. Hy het wel ‘n seëning ontvang en was geseënd in sy lewe, maar hy het sy posisie (as eersgeborene) verloor en moes die tweede plek inneem. Is dit wat julle werklik verlang? 

1 Korinthiërs / Korintim Aleph {10:11} “Maar al hierdie dinge het hulle oorgekom as voorbeelde en is opgeskrywe as ‘n waarskuwing aan ons op wie die eindes van die eeue gekom het. {10:12} Daarom, wie meen dat hy staan, moet oppas dat hy nie val nie.”. 

Mag dit nóóit van julle “(vul jou naam hierin)” gesê word, “het sy / haar geboortereg verag nie” nie. 

Congregation Melech Yisrael alle regte voorbehou